Bazot ni umupadiri w’Umufransa wo mu muryango w’Abamisiyoneri b’Afurika (Abapadiri bera) wagize uruhare rukomeye mu kwamagana ubwicanyi bwakorerwaga Abatutsi mu ntangiro y’imyaka ya 1960. Mu Ukuboza 1963, Bazot wari i Nyamasheke, yatabarije imiryango y’Abatutsi barenga ijana biciwe ababo imirambo yabo ikajugunywa mu ishyamba rya Nyungwe.

Padiri Henri Bazot niwe wa mbere wamaganye ubwo bwicanyi, avuga ku mugaragaro mu nama y’abakuru b’inama ba Paruwasi ko ubutegetsi bwa PARMEHUTU bwica, bugafungira abantu ubusa. Ku wa 22 Mutarama 1964 Bazot yandikiye uwari Perefe wa Cyangugu, Pascal Ngirabatware, yamagana ubwicanyi bwakorerwaga Abatutsi muri iyo Perefegitura. Iyo baruwa ya Padiri Henri BAZOT yayanditse avuga ibyo yiboneye, yerekana ubugome bwakoreshejewe mu kwica Abatutsi b’i Cyangugu. Ku wa 15 Mutarama 1964 Padiri bazot afatanyije na Mugenzi we Hansjörg Gyr bandikiye itangazamakuru ry’i Burayi barimenyesha ubwicanyi bwariho bukorwa Abatutsi mu Rwanda.

Kubera aya mabaruwa atabaza, ubutegetsi bwa Repubulika ya mbere bwamwirukanye mu Rwanda. Padiri Bazot yabanje guhanishwa gufungishwa ijisho, ntiyemererwa gusohoka i Nyamasheke, abuzwa no kongera gusura abakristu be, nyuma yirukanwa i Nyamasheke asimbuzwa Padiri Rushita wari mwene nyina wabo wa Juvenali Habyarimana icyo gihe wari umusilikare mukuru mu gihugu.